ഇന്റർ കാശിയെ 2-0ന് തോൽപ്പിച്ചു കേരള ബ്ലാസ്റ്റേഴ്‌സിന് വിജയത്തുടക്കം

026-27 ഇന്ത്യൻ സൂപ്പർ ലീഗ് സീസണിലെ ആദ്യ മത്സരത്തിൽ ഇന്റർ കാശിയെ 2-0ന് പരാജയപ്പെടുത്തി കേരള ബ്ലാസ്റ്റേഴ്‌സിന് വിജയത്തുടക്കം.

ഞായറാഴ്ച പുണെയിൽ നടന്ന മത്സരത്തിൽ വിബിൻ മോഹനനും അരങ്ങേറ്റക്കാരൻ ആന്ദ്രെ ഗ്രീനുമാണ് ബ്ലാസ്റ്റേഴ്‌സിനായി ഗോളുകൾ നേടിയത്.

18-ാം മിനിറ്റിൽ കൊറോ സിങ്ങിന്റെ ക്രോസിൽ നിന്ന് പന്ത് വലയിലെത്തിച്ച ക്യാപ്റ്റൻ വിബിൻ മോഹനനാണ് ബ്ലാസ്റ്റേഴ്‌സിന് ലീഡ് സമ്മാനിച്ചത്.

ആദ്യ പകുതിയിൽ ആധിപത്യം പുലർത്തിയ ബ്ലാസ്റ്റേഴ്‌സ് രണ്ടാം ഗോളിനായി നിരന്തരം ശ്രമിച്ചെങ്കിലും ഇടവേളയ്ക്ക് മുമ്പ് ലീഡ് ഉയർത്താനായില്ല.

രണ്ടാം പകുതിയിൽ മെച്ചപ്പെട്ട പ്രകടനം പുറത്തെടുത്ത ഇന്റർ കാശി പലതവണ സമനില ഗോളിന് അടുത്തെത്തിയെങ്കിലും ബ്ലാസ്റ്റേഴ്‌സ് പ്രതിരോധം മറികടക്കാനായില്ല.

ഇഞ്ചുറി ടൈമിന്റെ നാലാം മിനിറ്റിൽ മുൻ ആസ്റ്റൺ വില്ല താരം ആന്ദ്രെ ഗ്രീനാണ് ബ്ലാസ്റ്റേഴ്‌സിന്റെ വിജയം ഉറപ്പിച്ചത്.

പകരക്കാരനായി ഇറങ്ങിയ പുതിയ സൈനിങ് മുഹമ്മദ് സനാൻ നൽകിയ പാസിൽ നിന്ന് പന്തുമായി മുന്നേറിയ ഗ്രീൻ, കാശി ഗോൾകീപ്പർ ആൽബിനോ ഗോമസിനെ മറികടന്ന് പന്ത് വലയിലെത്തിക്കുകയായിരുന്നു.

ആഷ്‌ലി വെസ്റ്റ്‌വുഡിന്റെ കീഴിൽ ബ്ലാസ്റ്റേഴ്‌സ് ഒക്ടോബർ 18 ഞായറാഴ്ച നടക്കുന്ന അടുത്ത മത്സരത്തിൽ നോർത്ത് ഈസ്റ്റ് യുണൈറ്റഡിനെ നേരിടും.