സിക്കിം ഗോൾഡ് കപ്പ്: ഗോകുലം 4-1ന് വിജയിച്ചു

42ആം സിക്കിം ഗോൾഡ് കപ്പിലെ ആദ്യ മത്സരത്തിൽ ഗോകുലം കേരള എഫ്‌സിക്ക് വിജയം. സിക്കിം പ്രാദേശിക ലീഗ് ചാമ്പ്യൻ ടീമായ തണ്ടർ ബോൾട്ട് നോർത്ത് യുണൈറ്റഡിനെ 4-1 എന്ന മാർജിനിലാണ് മലബാറിയൻസ് തോൽപ്പിച്ചത്.

കളിയുടെ 9ആം മിനിറ്റിൽ ചാങ്തെ സീസണിലെ ആദ്യ ഗോൾ നേടി. തുടർന്ന് 25ആം മിനിറ്റിൽ നേടിയ ഗോളിലൂടെ തണ്ടർ ബോൾട്ട് സമനില പിടിച്ചു. ഇതിന് മറുപടിയായി ആദ്യ പകുതിയിൽ തന്നെ ഗോകുലം 2 ഗോളുകൾ കൂടി നേടി. 44ആം മിനിറ്റിൽ ചോത്തെയും 45+2 മിനിറ്റിൽ വിദേശ താരം ഡെന്നി ആൻറ്വിയുമാണ് ഗോൾ നേടിയത്. 70ആം മിനിറ്റിൽ പകരക്കാരനായി ഇറങ്ങിയ വിദേശ താരം വിക്ടർ സ്കോർ 4-1 ആക്കി ഉയർത്തി.

കളിയുടെ എല്ലാ മേഖലകളിലും ഗോകുലം മുന്നിട്ടുനിന്നു. എതിരാളികൾക്ക് ഒരു ഘട്ടത്തിലും മേൽക്കൈ നേടാൻ അവസരം നൽകിയില്ല. മിഡ്ഫീൽഡിൽ ഫലപ്രദമായി കളിമെനഞ്ഞ ടീം തുടർച്ചയായി ആക്രമിച്ചു. വിദേശ പ്രതിരോധ താരം മിക്കേലും വിങ്ങുകളിൽ ചോങ്ത്തെയും ചോത്തെയും നടത്തിയ പ്രകടനം ടീമിന്റെ മൊത്തത്തിലുള്ള പ്രകടനത്തിന് ഗുണം ചെയ്തു. ചോത്തെയാണ് പ്ലെയർ ഓഫ് ദി മാച്ച്.

ഹെഡ് കോച്ച് കാർലോസ് പേരെയ്റ മത്സരശേഷം പ്രതികരിച്ചു. "ടീമിന്റെ പെർഫോമൻസിൽ സന്തോഷമുണ്ടെങ്കിലും കിട്ടിയ അവസരങ്ങൾ പലതും നഷ്ടപ്പെടുത്തുകകൂടി ഉണ്ടായി, അതിൽ മാറ്റമുണ്ടാവാൻ ഞാൻ ആഗ്രഹിക്കുന്നു, വരും മത്സരങ്ങളിൽ കൂടുതൽ മികച്ച പെർഫോമൻസ് നൽകാൻ ടീമിനെ സജ്ജമാക്കും" എന്ന് കാർലോസ് പേരെയ്റ പറഞ്ഞു.