തൃശൂർ മാജിക്കിനെ 2-1ന് വീഴ്ത്തി കാലിക്കറ്റ് എഫ്‌സി

സൂപ്പർ ലീഗ് കേരള ചരിത്രത്തിലെ ഏറ്റവും വേഗമേറിയ ഗോൾ നേടി എമിൽ ബെന്നി റെക്കോർഡിട്ട മത്സരത്തിൽ തൃശൂർ മാജിക് എഫ്‌സിയെ 2-1ന് പരാജയപ്പെടുത്തി കാലിക്കറ്റ് എഫ്‌സി.

ശനിയാഴ്ച തൃശൂർ കോർപ്പറേഷൻ സ്റ്റേഡിയത്തിൽ നടന്ന മത്സരത്തിൽ ഇഞ്ചുറി ടൈമിൽ അബ്ദുൾ സമദ് പിപി നേടിയ ഗോളിലാണ് കാലിക്കറ്റ് എഫ്‌സി വിജയം സ്വന്തമാക്കിയത്.

മത്സരം തുടങ്ങി വെറും 48 സെക്കൻഡിനുള്ളിൽ ഗോൾ നേടിയ എമിൽ കാലിക്കറ്റിന് ലീഡ് സമ്മാനിച്ചു. സൂപ്പർ ലീഗ് കേരള ചരിത്രത്തിലെ ഏറ്റവും വേഗമേറിയ ഗോളെന്ന റെക്കോർഡും ഇതോടെ എമിലിന്റെ പേരിലായി.

61-ാം മിനിറ്റിൽ സിലാജിത് സാന്ത്രയിലൂടെ തൃശൂർ മാജിക് സമനില പിടിച്ചെങ്കിലും 91-ാം മിനിറ്റിൽ സമദ് നേടിയ ഗോൾ കാലിക്കറ്റിന് വിജയം സമ്മാനിച്ചു. ഇതോടെ സീസണിലെ അപരാജിത കുതിപ്പ് നിലനിർത്താനും കാലിക്കറ്റിനായി.

മൂന്ന് മത്സരങ്ങളിൽ നിന്ന് എട്ട് പോയിന്റാണ് കാലിക്കറ്റിനുള്ളത്. സെപ്റ്റംബർ 26ന് തിരുവനന്തപുരം കൊമ്പൻസിനെ 2-0ന് പരാജയപ്പെടുത്തി സീസൺ ആരംഭിച്ച കാലിക്കറ്റ്, ഒക്ടോബർ രണ്ടിന് മലപ്പുറം എഫ്‌സിയുമായി 1-1ന് സമനിലയിൽ പിരിഞ്ഞിരുന്നു. തുടർന്ന് നടന്ന ഷൂട്ടൗട്ടിൽ കാലിക്കറ്റിനായിരുന്നു വിജയം.

അതേസമയം, മൂന്ന് മത്സരങ്ങളിൽ നിന്ന് ഒരു പോയിന്റ് മാത്രമുള്ള തൃശൂർ മാജിക് പോയിന്റ് പട്ടികയിൽ അവസാന സ്ഥാനത്താണ്. ഒരു മത്സരം കുറച്ച് കളിച്ച മലപ്പുറം എഫ്‌സിക്കും ഒരു പോയിന്റാണുള്ളത്.

സെപ്റ്റംബർ 25ന് കണ്ണൂർ വാരിയേഴ്‌സിനോട് 1-0ന് പരാജയപ്പെട്ട തൃശൂർ, ഒക്ടോബർ ഒന്നിന് ഫോർസ കൊച്ചിയുമായി ഗോൾരഹിത സമനിലയിൽ പിരിഞ്ഞിരുന്നു. എന്നാൽ ഷൂട്ടൗട്ടിൽ തൃശൂരിന് തോൽവി വഴങ്ങേണ്ടിവന്നു.