ഗോൾഡ് കപ്പ് സെമിയിൽ ഗോകുലം കേരള എഫ്‌സിക്ക് 2–3 തോൽവി

ഗാങ്ടോക്കിലെ പാൽജോർ സ്റ്റേഡിയത്തിൽ നടന്ന സെമിഫൈനലിൽ ആക്രാമൻ എസ്സി സിക്കിമിനോട് രണ്ടിനെതിരെ മൂന്ന് ഗോളുകൾക്ക് ഗോകുലം കേരള എഫ്‌സി പരാജയപ്പെട്ടു. ഇതോടെ 42-ാമത് ഓൾ ഇന്ത്യ ഗവർണേഴ്സ് ഗോൾഡ് കപ്പിലെ മലബാറിയൻസിന്റെ പോരാട്ടം അവസാനിച്ചു. നിരവധി ഗോൾ അവസരങ്ങൾ സൃഷ്ടിച്ചെങ്കിലും അവസാന ഘട്ടത്തിൽ വഴങ്ങിയ പെനാൽറ്റി തിരിച്ചടിയായി.

മത്സരത്തിന്റെ തുടക്കത്തിൽ തന്നെ ആക്രാമൻ എസ്സി സിക്കിം ഗോൾ നേടി മുന്നിലെത്തി. 30-ാം മിനിറ്റിൽ ബ്രസീലിയൻ സ്ട്രൈക്കർ ക്രിസ്ലൻ ഹെൻറിക്വെ ഹെഡറിലൂടെ ഗോകുലത്തിനായി സമനില ഗോൾ നേടി. ക്ലബിനായി ക്രിസ്ലൻ നേടുന്ന ആദ്യ ഗോളായിരുന്നു ഇത്. ആദ്യ പകുതിയിൽ നിരവധി അവസരങ്ങൾ ലഭിച്ചെങ്കിലും അവ ഗോളാക്കാനായില്ല. ആദ്യ പകുതി 1–1 എന്ന നിലയിൽ അവസാനിച്ചു.

രണ്ടാം പകുതിയിലും ആക്രമണം തുടർന്ന ഗോകുലം 70-ാം മിനിറ്റിൽ ലീഡ് നേടി. ക്രിസ്ലൻ ഹെൻറിക്വെ തന്റെ രണ്ടാം ഗോളിലൂടെ ടീമിനെ 2–1ന് മുന്നിലെത്തിച്ചു. എന്നാൽ ഗോകുലത്തിന്റെ ഒരു പാസ് പിഴവ് മുതലെടുത്ത ആക്രാമൻ എസ്സി സിക്കിം സമനില ഗോൾ കണ്ടെത്തി. സ്കോർ 2–2 ആയി.

മത്സരം അവസാന ഘട്ടത്തിലേക്ക് കടന്നപ്പോൾ ആക്രാമൻ എസ്സി സിക്കിമിന് അനുകൂലമായി പെനാൽറ്റി ലഭിച്ചു. ഇത് ഗോളാക്കി അവർ 3–2ന് മുന്നിലെത്തി. സമനില ഗോളിനായി ഗോകുലം അവസാന നിമിഷം വരെ ശ്രമിച്ചു. അവസാന മിനിറ്റിൽ ലഭിച്ച കോർണറിൽ നിന്ന് ഗോളിനടുത്തെത്തിയെങ്കിലും ലക്ഷ്യം കണ്ടില്ല. ആക്രാമൻ എസ്സി സിക്കിം ഫൈനലിലേക്ക് യോഗ്യത നേടി.

ടൂർണമെന്റിലുടനീളം മികച്ച ടീം പ്രകടനം കാഴ്ചവെച്ച ഗോകുലത്തിന്, ആദ്യ പകുതിയിൽ ലഭിച്ച അവസരങ്ങൾ ഗോളാക്കി മാറ്റാൻ കഴിയാതിരുന്നത് നിർണായകമായി.

ഇനി ഒക്ടോബർ 30ന് ആരംഭിക്കുന്ന ഇന്ത്യൻ ഫുട്ബോൾ ലീഗിലാണ് ഗോകുലം കേരള എഫ്‌സിയുടെ ശ്രദ്ധ. പുതിയ സീസണിനായുള്ള തയ്യാറെടുപ്പുകൾ ടീം തുടരും.